Mama wa vilumika makhumi gha biri na vinayi Matrida Mwale wabira mudambo la Msusu apo wakakhumbanga kuponoska mwana wake msungwana Grace Mbewe wavilimika vinkhonde na chimoza uyo wakabira apo wakasewerenga nawanyake pa 28 January 2024 ku Emfeni.
Vamanyikwa kuti chiponde Grace Mwale padazi ilo wakalutira kudambo la Msusu pamo na wanyake wabiri kuti wakagagamuche, ndipo wakati wali mkati mwakusewera kwawo Grace wakaluta kwakuzama ndipo wakatondeka kuskamba. Wanyake wakachimbira kukaphala kukaya ndipo mama wake wakudukiramo mumaji mula kuti waponoske mwana wake ndipo nayo wakabiraso.
Pamanyuma pake wanthu wamuchikaya ndiwo wakakazuwula mathupi ghabo ndipo wakachimbilira nawo ku chipatala cha Emfeni uko kwachitima vikaphalika kuti wakiza nawo kuti wafwa kale.
Ngozi iyi yikaphalirika ku polisi ya Emfeni ndipo wapolisi wakaluta kukaona pamalo apa wanthu aba wakabilira ndiponso nakuluta kuchipatala. Matrida na Grace wakafwa chifukwa chakukhapila padera pakubila mumaji, ndipo palije kaghanaghaniro kakuti mnyake watolapo lwande.
Polisi ya Jenda yikuchenjezga wanthu kuti waleke kukumbuka, panji kugeza mu madambo ghakuzula munyengo yavula iyi. Kweniso pakuthaska wanthu awo wabira watorenge nkhwantha zakusyamba kukana kusangana na ngozi zinyake mkati mwamulimo wakuponoska wakubira
Mama Matrida na mwana wake wakafumanga muchikaya cha kwa Perete fumu yikulu Mabulobo mu boma la Mzimba.
