Apolisi ku Area 24 mu mzinda wa Lilongwe ati amanga mphunzitsi wamkulu pa sukulu ya sekondale ya Eagles Academy, pomuganizira kuti anaba ndalama zomwe ophunzira adalipira pofuna kuti alembe nawo mayeso a fomu 2 omwe ayamba Lachiwiri.
Wachiwiri kwa m’neneri wa apolisi m’chigawo chapakati chakumadzulo, Sub Inspector Foster Benjamini, wati mphunzitsiyu yemwe dzina lake ndi Desmond Chidandale wazaka 30, akusungidwa mchitokosi kamba kakuba ndalama za ophunzira 6 zokwana K172,000.
Ophunzirawa adapereka ndalamazi kuti alembe nawo mayeso a chaka chino a fomu 2 omwe angoyamba lero.
Kumangidwa kwa m’phunzitsiyu kwadza kutsatira makolo anawa atakadandaula ku polisi za nkhaniyi ataona kuti ana awo alephera kulemba nawo mayeso lero.
Mphunzitsi wamkuluyu amachokera m’mudzi mwa a Chitedze kwa mfumu yaikulu Malili m’boma la Lilongwe.
Ndipo posachedwapa mphunzitsiyu akaonekera ku bwalo lamilandu komwe akayankhe pa mwandu wakuba.
