Mnyamata wina yemwe amayankha mlandu kale, wamangidwaso kachiwiri pamodzi ndi mzake wina yemwe amafuna kukamupatsira chamba chomwe anachibisa munkhwayira tsiku lakumva mlandu.
Malingana ndi ofalitsa nkhani pa Polisi ya Zomba, a Patricia Supuliano, oganizilidwa awiriwa ndi Estery Evance wa zaka 19 komaso Bonface Phiri wa zaka 22.
A Supuliano ati izi zachitika Lachiwiri pa 16 April, 2024 pomwe a Phiri anali ku bwalo la milandu komwe amayankha mlandu wina ndipo akuti Evance anapita kukamvera mlanduwo.
Ofalitsa nkhaniyu wati Evance adanyamula nkhwaila zowoneka mokayikitsa kwambiri zomwe amafuna awapatsire a Phiri akamabwelera ku ndende ya Zomba komwe amawasunga podikira chigamulo cha mlandu wawo.
Kamba kokayikira ndi maonekedwe a nkhwayirazo, a Polisiwo anamulanda Evance ndi kuzitenga kuti aziwonetsetse ndipo akuti apapa ndi pomwe anapeza pansi pake atachinyiza chamba.
Apolisi atazindikira za matcherawa, sanachedwe koma kuthira zingwe makosana awiriwa ndipo zatelemu, a Phiri awonjezera mlandu wina pa oyamba omwe amayankha.
Evance pamodzi ndi Phiri, onse akuyembekezeka kukawonekera ku bwalo la milandu posachedwapa komwe akayankhe mlandu apezeka ndi chamba popanda chilorezo.
