Fikitsani uthengawu ku Mangochi kwa a Mutharika: zobwelera m’boma ndi maloto chabe, a Malawi onse maso nga! pa Chakwera, watero ndi nduna ya Maboma Aang’ono a Richard Chimwendo Banda.
Polankhula potsekera zokambirana mu nyumba ya malamulo lero, a Chimwendo Banda ati chipani chotsutsa cha DPP chinatuluka m’boma ndipo sichibweleranso. Iwo ati a Malawi ambiri akukumbukirabe mavuto amene anawaona ndi chipanichi.
“Kaya Kamba atadikhula, sizingatheke kuti DPP ibwelerenso,” kutanthauzira kwa mawu awo kutha kukhala kotero.
Mawu a Chimwendo adza pomwe a Peter Mutharika dzulo lomweli anabwereza kunena kuti DPP ibwelerenso m’boma ndipo mtsogoleri wake akhala iwo basi. Koma a Chimwendo ati olo DPP itabwera ndi mnyamata kaya ndi gogo, sikulowanso m’boma.
“A Malawi chikhulipiliro chawo chili mwa a Chakwera ndipo pa chisankho cha chaka chamawa azawina ndi 70% ya mavoti,” iwo anatero.
Mukuona kwawo a Chimwendo, palibenso cholepheretsa a Chakwera kupitiriza kutsogolera dziko lino ndipo olo za masankho a chibwereza sizizafunika.
