Apolisi ku Kasungu atsekera mchitokosi anthu atatu omwe akuwaganizira kuti anapha bambo wa zaka 38 yemwe adamugwira akuba nkhuku.
Anthuwa, ndi a Simon Genesis a zaka 40, Kachule Gwilire, a zaka 53 Komanso a Chrisy Genesis a zaka 53, onsewa a m’mudzi mwa a Genesis mfumu yaikulu Kasichi m’bomali.
Malingana ndi a Joseph Kachikho omwe ndi wofalitsa nkhani za polisi m’bomali, anthuwa akuwaganizira kuti anapha a Peter Phiri.
A Kachikho ati a Phiri adasowa kumayambiriro kwa November ndipo abale awo anakanena ku polisi ya Ndonda za kusowaku.
A polisi adayamba kafukufuku yemwe anaonetsa kuti atatuwa amadziwapo kanthu za imfayi.
Zinadziwika kuti a Phiri adagwidwa akuba nkhuku ndipo anthuwa adawapha a Phiri ndikukwilirira thupi lawo m’dzenje.
Apolisi ndi achipatala anakafukula thupilo ndipo atalipima, achipatala apeza kuti a Phiri adamwalira kaamba kovulala m’mutu.
Anthuwa ali mchitokosi cha apolisi ndipo akuyembekezereka kukaonekera ku bwalo la milandu.
