Dan Lu ayanika mimba ya mkazi wake pa m’mbalambanda

Oyimba otchuka mdziko muno ndi nyimbo za chamba cha Afro, wazizwitsa mtundu wa a Malawi pamene wakhala mMalawi mmodzi yemwe waika zithunzi za mimba ya mkazi wake pa Intaneti.

Anthu ambiri ati zomwe wachita oyimbayu ndi kunyazitsa chikhalidwe cha amalawi komanso kulaura.

Oyimbayu yemwe watchukanso kwambiri ndi nyimbo yake ya “Sweet Banana”, adalimba mtima kuyiwala chikhalidwe cha ulemu cha chimalawi pamene lachisanu adaika dzithunzi dza mkazi wake Emmie Kamkweche koma dzovula mimba yonse ili padagu pa tsamba la macheza lija la facebook.

Malingana ndi mwiniwake Dan Lu, yemwe dzina lake lonse ndi Dan Lufani, poti iye adachilimika kuyimitsa Emmie iye wati ali tcheru kudikira kuti akhale bambo a mwana yemwe akumuyembekezerayo, pamene awiriwa akuoneka okondwa zedi ndi kuyimaku.

Koma malingana ndi anthu ena amene akhala akuikapo maganizo awo pa tsambali, akuonetsa osakondwa ndi mchitidwe umene oyimbayu wachita poti wayalutsa mkazi wake komanso wanyazitsa chikhalidwe cha ulemu cha chi Malawi.

Malingana ndi macheza a pa gulupu ya whatsap yomwe Malawi24 yawona, yomwenso Emmie ndi mmodzi mwa ma membala, zaonetsa kukwiya kwa anthu pamene anafunsa mafunso mzimayiyu chifukwa chimene achitira izi poti pali anthu ambiri otchuka ndi a ndalama zochuluka mdziko muno koma safika mlingo uwu, koma mkazi wa Dan amangoona ma uthenga ndi mafunso koma samayankhapo kanthu.

Gulupuyi yomwe ndi ya azimayi okhaokha, afunsa Emmie ngati mimbayi ili yoyamba ndipo kuti ndi ndani uyo adapereka malango kwa awiriwa pa tsiku la ukwati wawo womwe udachitika mchaka cha 2016.

“Koma kudziwika kuli apo koma abale ulemu ndi ofunika, ndi ndani adakulangizani koma?”