A Dr. Kizito Tenthani tsopano ndi mlembi wa zipani zandale m’dziko muno.
Izi zikudza kutsatira kuvomelezedwa kwa a Tenthani pa udindowu ndi nyumba ya malamulo.
Potsimikiza za nkhaniyi, m’khalapampando wa komiti yosankha anthu m’maudindo osiyanasiyana a boma ku nyumba ya malamulo a Joyce Chitsulo adati ndi okhutira ndi kusankhidwa kwa a Tenthani pa udindowu ndipo anati ali ndi chiyembekezo kuti a Tenthani agwira ntchito yawo mwaukadaulo komanso modzipeleka.
Mwa zina, a Chitsulo anati ali ndi chiyembekezo kuti a Tenthani awonetsetsa kuti akulimbikitsa lamulo la zipani zandale lomwe mwa zina limaletsa zipani zandale kugawa katundu osiyanasiyana kwa ozitsatira ake ngati njira imodzi yokopera anthu.
A Chitsulo adatinso akuyembekezera kuti zipani za ndale ziwonetsetsa kuti zikubweletsa pa mbalambanda njira zomwe zipanizi zimapezera chuma chake.
A Tenthani adapambana mayeso omwe bungwe la Civil Service Commission lidachititsa mu mwezi wa January chaka chino.
