Timu ya mpira wa miyendo ya Mighty Mukuru Wanderers ikupitilira kumwetsa tiyi wamkaka anthu omwe amaitsatira.
Wanderers yomwe sabata latha idagonjetsa timu ya Civo Service United ndi zigoli ziwiri kwa duu pa bwalo la masewero la Kamuzu munzinda wa Blantyre, lero yasasanthaso timu ya Red Lions ndi zigoli zitatu kwa tetete pa bwalo la zamasewero la Balaka mu mpikisano wa mpira wa miyendo omwe ndalama zake imapeleka ndi kampani ya lamya za mmanja ya TNM
Christopher Kumwembe yemwe wasankhidwanso kukhala osewera amene wachita bwino pa masewerawa kuposa anzake onse ndi yemwe adachita chipongwe mikango ya ku Zomba pogoletsa zigoli zitatu yekha.
Kumwembe adatsogoza timu ya Wanderers mu mphindi zisanu ndi zinayi mu chigawo choyamba asadamwetsenso chigoli china mu mphindi 54 mu chigawo choyambachi.
Kumwembe adawomba nzinga omaliza mu mphindi 58 za chigawo chachiwiri kupangitsa kuti asilikali aku Zomba ayende tchibiyatchibiya komanso mozyolika .
Ndipo mphunzitsi wa Wanderers, Mark Harrison, adayamikira anyamata ake kaamba kodzipereka komanso kugwilizana zomwe akuti zidapangitsa manoma kuti apeze chipambano pamwamba pa asilikali aku Zombawa.
Koma m’mawu ake, mphunzitsi wa timu ya Red Lions, Mike Kumanga wati zidali zowawa kugonja pakhomo koma adanenetsa kuti ayesetsa kukonza zofooka zomwe waziwona monga kulephera kwa anyamata kupatsirana bwino mpira.
Pokhala osewera opambana anzake onse, Kumwembe walandira mphotho ya ndalama zokwana K150,000 komanso chikho kuchokera ku kampani ya Smile Life Insurance ndipo wati izi zimulimbikitsa kulimbikiranso mu masewera amtsogolo.
Wanderers tsopano ili ndi ma pointi okwana asanu ndi limodzi mu masewero ake awiri omwe yasewera kale.
Follow us on Twitter:
