Khala chete ndi mbwelera zakozo – akatswiri auza Chakwera

Akanakhala a Chilima ndi mikuluwiko yawo ija, mwina akanati n’konzen’konze ananyula maliro a eni; kapena akanangojama mulomowu ya Ma Blacks.

Mkulu wa zipani zotsutsa boma mu nyumba ya malamulo amenenso ndi Mtsogoleri wa chipani chotsutsa cha Kongeresi wadzudzulidwa kolimba pa ganizo lake loti a Mutharika aitanitse zisankho zatsopano.

A Chakwera adanena izi pothililapo ndemanga pa nkhani yoti a Mutharika akuganizilidwa zopindula ku ndalama zakuba.

Pothililapo ndemanga pa nkhaniyi a Chakwera anati a Mutharika angoyenela kutula pansi udindo pamodzi ndi boma lawo lonse. Iwo anatinso a Mutharika aitanitse chisankho cha mmangummangu.

Koma akatswiri azamalamulo ndi ena andale ati ndemanga ya a Chakwera ndi yolakwika ndi yongotsogozedwa ndi dyera.

Iwo ati malinga ndi malamulo a dziko lino, palibe chifukwa choti wina akambe za chisankho cha madulira.

Malinga ndi akatswiriwo ati malamulo akunena moona mtima kuti ngati Mtsogoleri watula pansi udindo, wachiwiri wake akuyenela kutenga.

Iwo ati ngati a Mutharika angatule pansi udindo kapena kuchotsedwa, a Saulos Chilima aiphula basi.