Inkosi ya Makosi Mmbelwa, imene ndi Mfumu yaikulu ya Angoni, yadzudzula a Livingstonia Synod ndi kuwachenjeza kuti akapanda kusamala athamangitsidwa mu dera lake.
Pa mwambo oveka ufumu a T/A Mzukuzuku ku Mzimba, mlembi wamkulu wa Synod ya Livingstonia a Levi Nyondo anadzudzula Mafumu a chingoni ati kamba komwa mowa ndi kukwatila mitala.
A Nyondo anaonjezelaponso kuti Mafumu ena amalimbikitsa anthu awo kuchita ziwirizo ngakhale amadziwa kuti ndi tchimo ndipo ndi zosaloledwa mu mpingo wa CCAP.
Pamene a Nyondo amanena izi ndikuti anthu mmbalimu akuwakuwiza.
Ataima ndi kuyankhulapo Inkosi Mmbelwa anadzudzula a Synod kuti asamayankhule mwa thamo pamaso pa Mafumu.
“Ife ngati Mafumu sitilakwa, ikakhala nkhani ya mowa ndi akazi ikukambidwa apayi, ndi chikhalidwe chathu,” anatelo Mmbelwa.
Mmbelwa anakumbutsa a mpingo kuti iwo anapeza anthu a chingoni akumwa mowa ndi kuchita mitala.
“Sitinali ife kupita kwa mpingo kukapempha mgwilizano ayi. A mpingo anatipeza ndi kuvomeleza kuti tizipanga chikhalidwe chathu tili ma membala awo, lero asasinthe,” anatelo Mmbelwa.
Kenako anachenjeza kuti akapanda kusamala, a mpingo atha kuthamangitsidwa mu dera lake.
