Posachedwapa pofuna kukaona phiri ku Mulanje kapena kujambulitsila mu tiyi ku Thyolo, a Malawi tizifunika kupita ndi chiphaso choyendela (passport).
A Vincent Wandale amene adalengeza kuti maboma a Thyolo ndi Mulanje ndi dziko loima palokha, alengezanso kuti tsopano asankha nduna zawo mu dzikolo.
A Wandale amene akutcha dziko lawo kuti ndi MUST analengeza pa tsamba lawo la Facebook kuti sabata ino kuli kulumbilitsa nduna ku dziko la MUST.
Iwo anaonjezelapo kuti akhalanso akutumiza makalata a ubale ku maiko ena kuwadziwitsa za dziko lawo la MUST.
A Wandale amene ali mtsogoleri wa dzikoli sananenepo amene akhale pa gulu la nduna zawo.
Anthu owatsatila a Wandale ananena monyogodola kuti a Wandale awakumbukile pamene akusankha nduna zawo.
A Wandale akhala akunena kuti iwo akudziwa kuti maboma a Thyolo ndi Mulanje tsopano ndi dziko loima palokha.
