A Mutharika sanayenera kujomba ku msonkhano wa AU

M’modzi mwa akatswiri pankhani za ndale m’dziko muno a Wonderful Mkhutche ati mtsogoleri wa dziko lino a Peter Mutharika mwanjira ina iliyonse anayenera kupezeka kumsonkhano wa atsogoleri maiko a mu Africa.

A Mutharika sanakhale nawo pamkumano wa atsogoleri a bungwe la African Union (AU) wanambala 29 omwe umachitikira ku Ethiopia.

Kumsonkhanowo dziko la Malawi linaimililidwa ndi kazembe wa dziko lino ku Ethiopia a Chimango Chirwa.

Poyankhula ndi nyuzipepala ino, katswiri pandaleyu wati chiganizochi sichabwino kwenikweni potengera kufunikira kwa msonkhanowu ku dziko la Malawi komaso kwa mtsogoleri.

A Mkhutche anena kuti chifukwa chopulumutsa ndalama chomwe likupeleka boma pakulephera kwa a Mutharika kukhala nawo pamsonkhanowu ndichosamveka.

“Pali zinthu zambiri zomwe boma lingachite pofuna kutitsimikizira kuti limasamaladi ndalama za ife anthu opereka misonkho osati kulepheretsa ulendo ofunikira ngati uwu.

“Vuto ndiloti dziko lino muzaka zapitazi lalephera kugwiritsa ntchito bwino mwayi wopezeka kumsonkhanowu ndichifukwa chake lero msonkhanowu timauona ngati opanda ntchito ndipo kupita kwathu kumangokhala ngati kukakwanilitsa chiwerengero,” atero Mkhutche.

Munkuonjezeraka kwawo a Mkhutche ati a Mutharika anapanga izi ngati mbali imodzi yandale komanso ndi cholinga chophimba anthu m’maso ndi kupewa zoyankhula za anthu.

Iwo anamaliza ndikunena kuti zinakakhala bwino mtsogoleri wa dziko linoyu anakapita ku msonkhanowu kuti akapereke dandaulo lake pankhani yolimbilana gawo lina la nyanja ya Malawi pakati pa dziko lino ndi dziko la Tanzania.