Sitisintha malamulo ndiomwewo – apolisi a pansewu atemetsa nkhwangwa pamwala

Apolisi apansewu mudziko muno atemetsa nkhwangwa pamwala kuti iwo sasintha malamulo omwe abweretsa atsopano ngakhale ma shoveli amaminibasi ndi owathandizila awo anapanga zionetsero.

Izi ndimalingana ndi wachiwiri kwa wa mkulu wa apolisi apansewu mmchigawo chakummwera a Alex Zimba omwe anena izi kuimodzi mwa nyumba zofalitsira nkhani mdziko muno.

A Zimba anena kuti zomwe akufuna oyendetsa magalimoto onyamula anthu komaso owathandiza awo kuti asinthe malamulo ena apansewu omwe abweretsedwa kumene, ndizopanda pake.

Iwo akanitsitsa mwantu wa galu kuti oyendetsa magalimoto onyamula anthuwa asayembekezele kuti momwe anapanga zionetsero lachisanu lapitali zinthu zisintha.

A Zimba anena kuti malamulo atsopano omwe awakhazikitsa apansewu ndichifikwa chakuchulukwa kwangozi zapansewu zomwe sizinasiye malo mdziko muno.

Moonjezera iwo anena kuti cholinga chawo sikufuna kuletsa galimoto za mtundu wa minibasi kuyenda mminsewu mdziko muno koma kufuna kuteteza miyoyo ya anthu onse oyenda pansewu.

Lachisanu lapitali pa 23 June, oyendetsa maminibasi mumzinda wa Blantyre anapanga zionetsero zokwiya ndi malamulo atsopano omwe akhasikitsidwawa ndipo oyendetsa maminibasi aku Mzuzu anapanga zionetsero tsiku lotsatila lake lomwe linali loweruka pa 24 June komweso anthu angapo anamangidwa kamba la zionetserozo.

Ena mwamalamulo atsopanowo ndioti: osakweza thumba la chimanga kapena katundu minibasi ndipo opezeka azilipila mlandu wa 20,000 MK kapena kukagwira ukaidi wa zaka zisano mogawana oyendetsa ndi omuthanfizira (Dalaiva ndi kondakitala).

Mashoveli onse amaminibasi auzidwa kuti asiye kukweza anthu anayi anayi mmipando ndipo kupezeka otero azazengedwa mlandu zaka 5 aliyense kapena 150,000 MK mogawana shoveli ndi omuthandiza.

Oyima malo osaloledwa (Wrong parking) azipeleka 20,000 MK kapena zaka zisanu ndipo lamulo lina lapita kwa ma basi akuluakulu kuti basi isayende usiku yopezeka mlandu 200,000 MK komaso mubasimo musamapezeke oima kupezeka oima mlandu 200,000 MK kapena dalaiva ndi kondakitala ku ndende zaka khumi.