Thupi la Singh aliotcha mawa

Thupi la yemwe anali mtsogoleri wa chipani cha United Independence (UIP) mayi Hellen Singh aliotcha mawa ku gome la Sikh mu mzinda wa Blantyre.

Malinga ndi m’modzi wa ku banja lofedwa a Asante Masantche, thupi la a Singh lizatengedwa ku nyumba yachisoni ya College of Medicine (CoM) kupita ku holo ya COMESA komwe anthu azakhale akukhudza thupi la a Singh ndikupitiliza ndimwambo wamapemphero asanapite ku gome la Sikh komwe akaliotche.

Pakanali pano, Boma lati ndilokhuzidwa pa imfa ya mayi Singh yemwe amalimbikisa mfundo za demokalase kudzera mu chipani chawo cha UIP.

A Singh womwe amwalila ndi zaka 64 zakubadwa atisiya loweruka kuchipatala cha Adventist atadwala nthenda ya cancer.

Malemu Singh anali katswiri pa malonda ndipo anali ndi kampani yobweleketsa magalimoto yomwe imatchedwa kuti SS Rent a Car.

Kuphatikiza apo analiso ndi Singh Trust pamene iwo amachita ndale zao mu chipani cha UIP.

Mayi Singh asiya ana awiri.